БИШКЕК, 2-фев. — Sputnik. Өлкө аймагында диний экстремизмдин алдын алуу аракеттери көрүлүп, Ысык-Көл облусунда атайын таймаш өттү. Ага жалпыга маалымдоо каражаттарынын өкүлдөрү, имамдар, Ысык-Көл облусунун ИИБнын 10-бөлүмүнүн өкүлдөрү катышты.
Таймаштын жүрүшүндө аяттарда айтылган сөздөрдү чечмелөө боюнча тапшырмалар берилди. Катышуучулардын динден канчалык деңгээлде түшүнүктөрү бар, же жогу оюндун жүрүшүндө белгилүү болду.
Диний экстремизмди алдын алуу багытында өткөрүлгөн викторинанын катышуучуларынын динден кабары бар экенине Ислам изилдөө институтунун директору Мамитбек Мырзабаев күбө болду.
Ушундай эле иш чара Ош шаарында өттү. "Исламдагы аялдын орду" практикалык конференцияга Ислам университетинин ректору Абдишүкүр ажы Нарматов жана облустагы күч түзүмдөрүнүн өкүлдөрү катышты. Ошондой эле, облустагы кыздар медреселеринин окуучулары да катышты.
Конференцияда аялдардын Ислам дининдеги жана башка тармактардагы орду талкууланды.
