БИШКЕК, 2-фев. — Sputnik. Президент Алмазбек Атамбаев Корея Республикасынын президенти Пак Кын Хени туулган күнү менен куттуктап, кайрадан Кыргызстанга чакырды. Бул тууралуу өлкө башчынын маалымат кызматы билдирди.
Куттуктоодо Кыргызстан Кореяны маанилүү өнөктөш катары эсептеп, өз ара пайдалуу кызматташтыкты арттырууга даяр экенин айтылат.
"Кыргыз-корей алака-катыштарындагы жандуу жылыштарды колдоо жана соода-экономикалык кызматташтыкты жандандыруу максатында Сизге ыңгайлуу убакта Кыргызстанга расмий иш сапар менен келүүгө кайрадан чакырам", — деп айтылат мамлекет башчынын сөзүндө.
Атамбаев андан тышкары Пак Кын Хени жылнаама боюнча кирип келген жаңы жылы менен куттуктап, ага чың ден соолук, бакыт-таалай, мамлекеттик иштерине ийгилик, ал эми дос корей элине тынчтык жана бакубатчылык каалады.
Кыргызстандын президенти 2013-жылдын 18-20-ноябрь күндөрү Пак Кын Хенин чакыруусу менен Кореяга расмий сапар менен барып келген.
