Бишкектин борборундагы жарандын атылышы боюнча окуянын чоо-жайы белгилүү болду

Жазылуу
Иликтөөнүн натыйжасында жабыркаган адамдын 40 жаштагы Бишкек шаарынын тургуну экени аныкталган. Ал алган жарааттарынан улам ооруканада каза болгон.

БИШКЕК, 2-фев. — Sputnik. Бишкектин Бөкөнбаев менен Исанов көчөлөрүнүн кесилишинде жарандын атып өлтүрүлүшү боюнча окуянын чоо-жайы аныкталганын ИИМ билдирди.

Кечээ саат 20.55те Биринчи Май райондук ИИБ азиат улутундагы эркек адам ок жеп Мамакеев атындагы Улуттук хирургиялык борборго түшкөнү тууралуу маалымат тараган. 

Окуя болгон жерге келген укук коргоо органдарынын кызматкерлери жеке фирма жайгашкан аймактан Макаров тапанчасынын үч огун жана кан тактарын табышкан. 

Уюшкан кылмыштуу топтун мүчөсү атылган жерден тартылган тасма
Иликтөөнүн натыйжасында жабыркаган адамдын 40 жаштагы Бишкек шаарынын тургуну экени аныкталган. Ал алган жарааттарынан улам ооруканада каза болгон. Бул боюнча соттук-медициналык экспертиза дайындалып, алдын ала маалымат боюнча ок маркумдун башына, ийнине жана көкүрөгүнө тийгени тастыкталган. 

Билдирүүгө ылайык, каза болгон жаран жүк ташуучу фирмада иштеген тааныштарына келген. Иш күнү аяктагандан кийин сыртка чыгып, таанышынын "Опель-Астра" үлгүсүндөгү унаасына отурган. Кеңседен чыгып келе жаткан айдоочу атылган октун үнүн угуп, качып барып, унаа менен белгисиз тарапка кеткен адамды байкап калган. Өзүнүн унаасынын жанына келгенде ок жеген таанышын көргөн. Дарыгерлер анын каза болгонун айтышкан.

Учурда бул боюнча Биринчи Май РИИБ тарабынан кылмыш иши козголуп, бардык экспертизалар дайындалды.

Тергөө иштери жүрүп жатат.

Жаңылыктар түрмөгү
0