БИШКЕК, 30-янв. – Sputnik. Бүгүн Чыңгыз Айтматов атындагы кино үйүндө макал-ылакаптардын негизинде тартылган роликтердин бет ачары болуп өттү. Бул тууралуу Sputnik Кыргызстан маалымат агенттигинин кабарчысы жеринен билдирди.
Он мүнөттүк тасмалар "Макал Art" чыгармачылык коомдук бирикмеси тарабынан тартылган. Анын негизги максаты коомчулуктун руханий байлыгын жогорулатуу болуп эсептелет.
"Макал Art" коомдук бирикмеси 2013-жылы түзүлгөн. Алар макал-лакаптардын маңызын ачуу максатында "100 макал" долбоорун иштеп чыгышкан. Учурда "Чептен эрдин күчү бек", "Өздөн чыккан жат жаман, өзөктөн чыккан өрт жаман" жана байлык бийликтин адам баласына тийгизген таасири тууралуу беш тасма тартылып, ал чакан чөйрөдө талкууга алынды.
Тартылган тасмалар кыргыздын илгерки жашоосу аркылуу чагылдырылган. Талкуунун катышуучулары бүгүнкү жашоонун көрүнүшү менен дагы чагылдырууну сунушка коюшту.
Жыйында элди руханий жактан өнүктүрүүнүн таасирин жогорулатуу үчүн тасмаларды Коомдук биринчи каналдан көрсөтүү сунушу колдоого алынды.
