БИШКЕК, 25-янв. — Sputnik. Екатеринбургдун "Урал" командасынын курамында ойногон кыргызстандык Тилек Бабединов Түркиянын Алания калаасында өткөн футбол боюнча мелдеште мыкты оюнчу аталды. Оюн өспүрүмдөр арасында уюштурулган.
12 жаштагы Тилек Бабединов Ош облусунун Өзгөн шаарынан. Ал мындан 10 жыл мурда ата-энеси жана бир туугандары менен Россиянын Екатеринбург шаарына көчүп кеткен. Бул тууралуу мекендешибиз Талгат Абдракманов билдирди.
Екатеринбург калаасынын №113 мектебинин 6-классында окуган жаш спортчуну "Урал" футбол командасы мындан төрт жыл мурда тандап алган.
"Келечекте Криштиану Роналду, Леонель Месси сыяктуу оюнчулардай болуп, бийиктиктерди багынткым келет. Ата-энем, бир туугандарым жакшы колдоо көрсөтүшөт. Алар мени Россиянын аймагында болгон ар бир оюнда коштоп жүрүшөт", — дейт келечектен көптү үмүттөндүргөн Бабединов.
Үч бир туугандын кенжеси Бабединов Россиянын Санк-Петербург, Москва шаарларында болгон оюндарда өзүнүн ыкчам аракетин көргөзүү менен бир нече жолу атайын дипломдордун жана акчалай сыйлыктардын ээси болгон.
