БИШКЕК, 17-янв. — Sputnik. Аалымдар кеңешинин өкүлдөрү Баткен облусунун Лейлек районундагы Жаны-Жер айыл өкмөтүнө караштуу Тажикстан менен чектешкен "60 жылдык" айылындагы мечитте жергиликтүү жашоочулары менен жолукту. Бул тууралуу Баткен облустук мусулмандар казыятынын маалымат кызматы кызматы билдирди.
"60 жылдык" айылындагы эл менен жолугушууда аалымдар кеңешинин төрагасы Абдишүкүр Нарматов ислам дини, анын ичинде ата-энени сыйлоо, достук боюнча айтып берип, калкты коңшулар менен ынтымактуу болууга чакырды.
"Эгер адамдар бөлүнүп-жарылса, алардын күч-кубаты жана биримдиги кетет. Терс таасирлүү күчтөр бейкут жашоо биримдикте экенин жакшы билип, бузуп-жарууга аракет кылат. Андыктан биринчи иретте ынтымак маанилүү", — деди Абдишүкүр Нарматов.
Эл менен болгон жолугушуунун алкагында аалымдар кеңешинин төрагасы калкты ар дайым биримдиктүү болуп, улут, уруу аралык ынтымакка чакырып, терс маанайдагы күчтөрдүн таасирине алдырбоого чакырды.
