БИШКЕК, 11-янв. — Sputnik. Талды-Булак Сол жээк кениндеги "Алтын кен" ишканасынын кызматкерлери митинг өткөргөнүн Тоо-кен компанияларынын Борбордук комитенинин кесиптер бирлигинин төрагасы Элдар Тажибаев билдирди.
"Алтын кен" ЖЧКнын эмгек жамааты дүйшөмбү күнү саат 8.00дөн 9.00гө чейин жамааттык келишимге кол коюудан баш тартуу боюнча нааразачылык акциясын өткөрүштү. Профсоюз комитетинин төрагасы Таалайбек Кудусовдун маалыматына ылайык, талаш жараткан маселе айлык-акыны индексациялоо, иштеген жылдарына төлөнчү акы жана социалдык пакеттин камсыздалышы болууда.
"Буга чейин биз бул маселе боюнча компаниянын ыйгарым укуктуу өкүлү менен сүйлөшкөнбүз. Кийин жетекчилик айлык-акыны индексациялоодон жана башка талаптарды аткаруудан баш тарткан. Биз айлык-акыны көтөргүлө деген жокпуз, керектөө баалары кымбаттагандыктан айлыкты индексациялоону талап кылып жатабыз. Мыйзамга ылайык, жетекчилик биз менен сүйлөшүп жамааттык келишим түзүшү керек", — дейт Кудусов.
Маалыматка ылайык, эгер он күн ичинде алардын талаптары канааттандырылбаса кызматкерлер мөөнөтсүз нааразычылык акциясын башташат.
Талды-Булак Сол жээк кенин "Алтынкен" компаниясы иштетет. Акциялардын 40 пайызы "Кыргыз алтынга" тиешелүү. 60 пайызы кытайдын Superb Pacific Limited компаниясына таандык. Ал Кытайдагы эң ири Zijin Mining ишканасынын туунду компаниясы болуп саналат.
