БИШКЕК, 11-дек. — Sputnik. Базар-Коргон районунда таежесинин колунан каза тапты деген тестиер кыз мектепке бара жатып жолдо эс-учун жоготуп, аны жогорку класстын окуучулары такси менен үйүнө жеткиришкенин тергөө маалында кыздын бөлөсү айтып берген.
Үстүбүздөгү жылдын 8-декабрында эртең мененки саат 9.00дө райондук ички иштер бөлүмүнө ооруканадан наристенин өлүмү тууралуу маалымдалган. Жети жаштагы Тахмина Кенжебаеваны бир күн мурун таежеси ур-токмокко алганын ИИМ билдирген.
"Учурда кылмышка шектүү убактылуу кармоочу жайга алынган. Ал наристенин бир тууган таежеси. Окуя болгон күнү ал күйөөсү менен чырдаша кетип, үйгө келгенден кийин Тахминаны начар окуганы үчүн уруп койгон. Бирок кыздын таежеси наристени өлүп калат деп ойлобогонун айтууда", — дейт Базар-Коргон РИИБнын тергөөчүсү Нурбек Жоробеков.
Ал эми эртеси кадимкисиндей мектепке кетип, жолдон жыгылып калган кызды ооруканага окуучулар жеткирген. Тахмина ооруканага жетпей эле каза болгонун дарыгерлер аныкташкан.
"Жети жашар кыз бейтапканага келгенде жаны жок болчу. Карай келгенде денесинде көк ала тактар аныкталган", — дейт Базар-Коргон райондук ооруканасынын жандандыруу бөлүмүнун дарыгери Абдужалил Умаров.
Тергөөчү кыздын апасы бир тууганына доосу жок экенин айтып, тосмо арыз жазып бергенин белгиледи. Учурда тергөө иштери улантылууда.
