БИШКЕК, 11-дек. — Sputnik. Кыргыз-өзбек чек арасын кайтарган Ала-Бука районундагы "Кашка-Суу" заставасынын чек арачылары үчүн жаңы кызматтык имарат жана турак жай курулуп пайдаланууга берилгенин аталган мекеме билдирди.
Маалыматка ылайык, курулуш иштери АКШнын аскердик кызмат командачылыгы менен Мамлекеттик чек ара кызматы тарабынан ишке ашкан.
"Заставанын турак жай жана кызматтык жайлары чек арачылар жана алардын үй-бүлөлөрү үчүн ыңгайлашканы менен айырмаланат. Жаңы комплекс мамлекеттин чек арачыларга болгон камкордугун далилдеп, жоокерлерди шыктандырат", — деди "Кашка-Суу" заставасынын жетекчиси капитан Руслан Миңбаев.
Жаңы обүектилерди кабыл алуу салтанатына Башкы штабдын жетекчиси Бакыт Жылтыров, Мамлекеттик чек ара кызматынын Ош жана Жалал-Абад облусу боюнча башкармалыгынын жетекчиси Замирбек Надырбеков, жергиликтүү бийлик органдары жана аскер чек ара кызматкерлери катышты.
