БИШКЕК, 11-дек. — Sputnik. Бишкекте уурулук менен алектенген 17, 18 жана 19 жаштагы жарандардан турган кылмыштуу топ кармалганын шаардык ИИБ билдирди.
Маалыматка ылайык, кармалгандар Жалал-Абад облусунун тургундары экени аныкталган. Учурда алар төрт үй уурулугуна, беш каракчылыкка жана жаранга кол салуу боюнча шектелип жатат.
Кылмыштуу топ "жортуулга" көбүнесе кечке маал чыгып, адамдарды коркутуп-үркүтүп акчасын тоноп, терезеден үйлөргө кирип, буюм-тайымдарды уурдап келишкен.
Учурда тонолгон буюмдар алынып, жарандар камакка алынды. Кылмыш иши козголуп, тергөө кармалгандардын башка кылмыштарга тиешелүүлүгүн аныктап жатат.
