БИШКЕК, 8-дек. — Sputnik. Кыргызстанда ар бир бешинчи мектепте акча мыйзамсыз чогултуларын, ал каражаттар кандай максатта колдонулуп жатканы боюнча мектеп жетекчилиги ата-энелерге эч кандай маалымат бербей турганын билим берүү жана илим министри Элвира Сариева өзүнүн Facebook баракчасына жазды.
Белгилей кетсек, Сариева буга чейин өзүнүн социалдык тармактагы баракчасы аркылуу мектептерде акча чогултуу фактылары тууралуу билдирүүнү суранган.
Ал соцтармактан алынган маалыматтардын негизинде анализ чыгарылганын кошумчалайт.
Министрдин айтымында, ата-энелер бейөкмөт уюм катары катталган мекемелерге да акча которору аныкталган.
"Билим берүү министрлиги бейөкмөт уюмдардын каражатын текшергенге укугу жок", — дейт Сариева.
Элвира Сариева 2016-жылдын бюджетине мамлекеттик мектептерди 100 пайыз камсыз кылуу боюнча сурам жөнөтөрүн билдирет. Өлкөдөгү мектептер 86 пайызга гана каржыланарын айткан министр шаардык мектептердин каржылынышы мындан да төмөн экенин белгилейт.
Билим берүү министрлиги жакын арада бардык мектептер боюнча ачык база түзүлүп ишке кирерин билдирет. Ал жакта мамлекет тарабынан канча каражат бөлүнгөнү тууралуу бардык маалыматтар жайгаштырылат.
