Казакстанда 5 ай бою мал багып кулчулукта жүргөн үй-бүлө куткарылды

БИШКЕК, 7-дек. — Sputnik. Бир үй-бүлө Казакстандагы кулчулуктан бошотулуп чыкканын "Замандаш" ассоциациясы билдирди.

Маалыматка ылайык, үч балалуу үй-бүлө үстүбүздөгү жылдын 2-июлунда Алматы облусуна мал кайтарып иштөө үчүн чыгып кеткен. Ага айына 100 миң теңге төлөп берүү убадаланган. 

Аталган аймакка келгенден кийин аталган жаран Ибрагим аттуу адамдын малын бакмак болот. Бирок сүйлөшүлгөн боюнча ага 60 миң теңге гана маяна төлөнөрү ачыкталат. Кыргызстандыктардын айтымында, ал беш ай бою мал кайтарат, ал эми кош бойлуу келинчегин уй саадыртып, кичинекей балдарын үйгө камап коюшат.

Бул "эмгегине" жалданып барган үй-бүлө бөлүп-бөлүп болгону 30 миң теңге алат. Эжесинин өлгөнүн шылтоо кылып, кыргызстандык үй-бүлө араңдан зорго Алматы шаарына келип, "Замандаш" ассоциациясынын өкүлү Алтынбек Сыдыков менен жолугуп калат. Кыргызстандык үй-бүлөнүн башынан өткөн окуясын угуп, Алматыдагы кыргыз диаспорасы акча чогултуп, Кыргызстанга жеткирип коюшат.

Үй-бүлө учурда бардык кыйынчылыктардан кийин Кыргызстандын Алматы шаарындагы Башкы консулдугу "таман акы, маңдай тери менен тапкан акчасын алып берүүгө жардам берерине үмүт артып турган чагы.