БИШКЕК, 6-дек. — Sputnik. Ошто мас абалында кызматтык унаа менен жол кырсыгынын себепчиси болгон милиция кызматкери укук коргоо органдарынан кете турганын Sputnik агенттигине Ош ОИИБ билдирди.
Маалыматка ылайык, авария шаарда кечээ күндүз болгон. Милициядан Ош ИИБнын өкүлү MVD 108 Z мамлекеттик номерлүү "Жигули" унаасы менен "Мерседес" машинасын сүзүп алган.
"Наркологиялык экспертиза милиционердин мас экенин аныктады. Ал бул мезгилде кызмат учурунда болгон. Ички иштер министринин буйругу менен аталган милиционер кызматынан кетет. Соттун чечими менен бардык материалдык чыгымга төлөмөр болот", — деп айтылат билдирүүдө.
Учурда ИИМ башкармалыгы окуянын чоо-жайын иликтеп жатат.
