Коргоо министрлигинин мурунку жетекчилери менен "табакташтары" жоопко тартылат

БИШКЕК, 2-дек. — Sputnik. Мамлекеттин акчасын оңду-солду чачып көнгөн Коргоо министрлигинин мурунку жетекчилери менен "табакташ" болгон "Аскер курулуш" ишканасынын башкы директоруна карата кылмыш иши козголгонун УКМК билдирди.

Маалыматка ылайык, 2013-жылдын жаз айында министрлик менен "Аскер курулуш" мамлекеттик ишканасы Ош шаарына жалпы суммасы 82 миллион 475 миң сомдук жатакана куруу боюнча келишим түзгөн. Мында ишкана курулушту баштабай туруп, "Ояма" компаниясы менен ошол эле суммага субподряддык келишимге кол койгон.

Өз кезегинде министрликтин мурунку жетекчилиги аткарылган жумушка берилүүчү актыларсыз, келишимди бузуу менен эки жылдын аралыгында "Аскер курулушка" 91,4 миллион сом которууга жетишкен. 

Ал эми ишкана аталган суммадан "Ояма" компаниясына 15,5 миллион сом которуп, 9,3 миллионду курулуш материалдарын берген. Мындан тышкары, "Аскер курулуш" эки жыл бою компанияга мыйзамсыз түрдө 104 миллион сомдон ашуун каражат которгон. Бул акча которулгандан баштап эки жылга чейин "айланып" жүргөн.

Акча каражатын которууда ишкана мыйзам бузуп, эч кандай эсеп-фактура колдонгон эмес. Натыйжада аткарылган 25 миллион сомдук курулуш иштери үчүн 129,3 миллион сом которулганы аныкталган. 

Мындан тышкары, "Аскер курулуш" ишканасынын башкы директору "санаалаштары" менен бирге бюджеттик каражатты өз максаттарында ээн-эркин пайдаланып, ашыкча которулган 46,5 миллион сом ортодо "айланып" жүргөн.

Текшерүүнүн соңу менен Коргоо министрлигинин мурунку жетекчилигине, "Аскер курулуш" ишканасынын башкы директоруна карата "Кызматтык абалынан кыянаттык менен пайдалануу" жана "Ишенип берилген мүлктү өзүнө ыйгаруу" беренелеринин негизинде кылмыш иши козголду.

Учурда тергөө иштери жүрүп жатат.