БИШКЕК, 2-дек. — Sputnik. Панфилов районунун Вознесеновка айылында башталгыч класстын окуучуларынын ысык тамагы үчүн чогултулган 72 миң сомго чукул акчанын дайыны чыкпай жатканын Башкы прокуратура билдирди.
Маалыматка ылайык, аталган мектепте ата-энелердин макулдугу менен 1-4-класстын окуучуларына ысык тамак уюштуруу максатында ар бир баладан 100 сомдон чогултуу каралган. Акча тамактан тышкары, ашпозчунун айлыгына да жумшалмак.
Журналдагы каттоо эсеби боюнча сентябрь жана октябрь айлары үчүн ата-энелерден жалпы жонунан 71 миң 800 сом чогулуп, мектеп директоруна берилген. Бирок прокуратуранын текшерүүсү маалында директор ал акчаны көрсөтүп бере алган эмес.
Аталган факт боюнча Вознесеновка орто мектебинин жетекчилигине карата "Кызмат абалынан кыянаттык менен пайдалануу" жана "Ишенип берилген мүлктү өзүнө ыйгаруу" беренелеринин негизинде кылмыш иши козголуп, учурда тергөө амалдары жүрүп жатат.
