БИШКЕК, 13-окт. — Sputnik. Бүгүнкү оюнда коомдук тартипти төрт миң милиция кызматкери камсыздай турганын ИИМ билдирди.
Кыргызстан менен Бангладеш курама командаларынын Дүйнө чемпионатынын тандоо турунун алкагындагы беттешүүсү кечки саат сегизде башталат.
Маалыматка ылайык, милиция кызматкерлеринин басымдуу бөлүгү стадионго кире бериш жерде жана трибунада болот. Футбол күйөрмандарынын бардык бейбаштык аракеттерине дароо чара көрүлөт.
Министрлик оюн алдында стадионго чет-жакасы дыкат иликтене турганын белгилейт.
Стадионго кирүү алдында күйөрмандар текшерүүдөн өтөт: оюндун өтүшүнө жолтоо боло турган буюмдарды, петардаларды алып өтүүгө болбойт. Тыюу салынган нерселер менен өтүүгө аракет күйөрмандар стадионго киргизилбейт.
Укук коргоо органдары эгер стадиондо же анын айланасында шектүү нерселер байкалса, күйөрмандарды дароо милицияга кабарлоого чакырат.
