БИШКЕК, 12-окт. — Sputnik. Кыргызстандын курама командасына эртеңки оюн оңой болбой турганын Бангладеш курама командасынын машыктыруучусу Фабио Лопез билдирди.
2018-жылы өтө турган Дүйнөлүк чемпионаттын тандоо раунддарынын алкагында 13-октябрь күнү Бишкектеги Дөлөн Өмүрзаков атындагы стадиондо Кыргызстан менен Бангладештин командалары беттешет. Машыктыруучунун айтымында, команда узак убакыт бою учканга жана башка аба ырайынын шартына карабай өзүн куулуу-күчтүү сезип жатат.
"Эртеңки оюн тууралуу айта турган болсок, биздин алдыбызда эң аз айырма менен утулуу максаты турган жок. Ар бир машыктыруучу жеңишке жетүү боюнча максат коет. Биз да ушундай максат койдук. Биздин атаандашыбыз өзүн тажрыйбалуу команда катары көрсөттү, анын курамында 3-4 жакшы ойногон күчтүү оюнчулар бар", — деди ал.
Лопез ошондой эле, анын оюнчулары эртең каршылашына кыйын оюн көрсөтө турганын баса белгиледи.
"Кыргызстандын курама командасына эртең жеңил болбойт. Менимче, абдан кызыктуу оюн болот", — деди Лопез.
"В" тайпасындагы беш оюндун жыйынтыгы менен учурда Иорданиянын командасы он упай менен алдыда. Ал эми Австралиянын командасы төрт оюндун жыйынтыгы менен тогуз упай топтогон. Кыргызстандын курама командасы беш упай менен үчүнчү орунда турат. Төртүнчү орунда эки упай менен Тажикстан жана бир упай менен Бангладеш бешинчи орунда.
