БИШКЕК, 7-окт. — Sputnik. Кыргызстанда 20-октябрдан тарта үч күндүк Shape Eurasia-2015 эл аралык форуму өтө турганын Global Shapers уюмунун өкүлчүлүгү билдирди.
Маалыматка ылайык, форум Кыргызстандагы туризмди өнүктүрүү үчүн дүйнөлүк жана жергиликтүү лидерлердин ортосундагы карым-катнашдын аянт түзүп берүүнү жана мамлекеттин бизнес жаатындагы экономикалык мүмкүнчүлүктөрү менен тааныштырууну көздөйт.
Иш-чара дүйнөнүн 20 мамлекетинен келген өкүлдөрдү, Дүйнөлүк экономикалык форумдун катышуучуларын бириктирет.
"Shape Eurasia-2015 форумунун негизги темасы — көчмөндөр маданияты. Иш-чара "Go nomad" ураанынын алдында өтүп, Кыргызстандын дүйнөлүк аренадагы жетишкендиктери тууралуу баяндоого мыкты мүмкүнчүлүк түзүлөт", — дейт уюштуруучулар.
Жүзгө жакын адистер үч күндүк программанын алкагында өз көз караштары менен бөлүшөт. Иш-чарага премьер-министр Темир Сариев менен Улуттук банктын төрагасы Толкунбек Абдыгуловдун келиши күтүлүүдө.
Global Shapers — Дүйнөлүк экономикалык форумдун демилгеси менен түзүлгөн жаш профессионалдардын эң ири бирикмеси. Уюм жаштарга билим берүү ресурстарына жеткиликтүүлүктү камсыз кылуучу долбоорлорду түзүү менен алектенет.
