БИШКЕК, 29-сен. — Sputnik. Коррупцияга каршы күрөшүү Кыргызстандын да, Кытайдын да негизги багыттарынын бири экенин президент Алмазбек Атамбаев Кытай элдик банкынын төрагасы Чжоу Сяочуанды кабыл алуу учурунда билдирди.
Анын айтымында, акыркы төрт жылдын ичинде Кыргызстан менен Кытайдын ортосунда мамилелер жаңы деңгээлге — стратегиялык өнөктөштүктүн деңгээлине көтөрүлдү.
"Кыргызстан менен Кытай кызыкчылыктары, иш багыттары окшош. Мен дагы, КЭР Төрагасы Си Цзиньпин дагы өлкөдө коррупцияга каршы күрөштү ишибиздин негизги багыттарынын бири катары эсептейбиз. Кыргызстан Кытай менен мамилени жогору баалайт", — деп баса белгиледи Атамбаев.
Кытай элдик банкынын төрагасы Чжоу Сяочуань өз кезегинде өлкө башчысына жылуу кабыл алгандыгы үчүн ыраазычылык билдирип, кыргыз-кытай мамилелери саясий жана экономикалык чөйрөдө ыкчам өнүгүп жатканын белгиледи.
"Кытай элдик банкы өлкөнүн борбордук банкы болуп саналат. Кыргызстан менен Кытайдын борбордук банктарынын ортосундагы каржылык кызматташуу өлкөлөр аралык достукту бекемдөөдө зор мааниге ээ экендигин биз абдан жакшы түшүнөбүз", — деди ал.
Жолугушуунун жүрүшүндө президент менен Кытай элдик банкынын төрагасы Кыргызстан менен Кытайдын борбордук банктарынын алкагында каржы жана банк чөйрөсүндө кызматташууну кеңейтүү маселелерин кенен талкуулашты.
