БИШКЕК, 29-сен. — Sputnik. Кыргызстандык режиссер Руслан Акундун кыска метраждуу "Өтмөк" тасмасы Бразилиянын Сан-Паулу шаарында өткөн эл аралык кинофестивалда көрүүчүлөрдүн арзуусуна татыды. Бул тууралуу Кинематография департаментинин өкүлү, кино таануучу Гүлбара Төлөмүшова билдирди.
Маалыматка ылайык, ири фестиваль өткөн аптада аягына чыккан.
23 мүнөттүк драма Кыргызстандагы шайлоо, үгүт иштеринин карапайым элге тийгизген таасири, үгүтчүлөргө азгырылып "азыр келем" деп кеткен атасын күтө берип тажаган эки бир туугандын өз алдынча бир короо малды жайлоого айдап барышы баяндалат.
"Быйыл ушуну менен дүйнөнүн ар кайсы жеринде өткөн 16 масштабдуу кинофестивалдарга катышып келген "Өтмөк" тасмасы жакын арада франциялык Canal+ телеканалынан көрсөтүлөт", — деди Төлөмүшова.
Мындан тышкары, "Өтмөк" тасмасы Берлинде өтө турган балдар жана өспүрүмдөргө арналган VIII эл аралык кинофестивалга катыша турганы маалым болду. Тасманы Берлин көрөрмандарына жана фестивалдын калыстар тобуна художник-коюучу Максат Болотбеков тартуулайт.
