БИШКЕК, 16-сен. – Sputnik. Жол менен суу каналдары болмоюн аймак өнүгө албайт. Себеби, жол менен суу адамдын кан тамыры сыктуу. Мындай пикирин президент Алмазбек Атамбаев Лейлек районунун Исфана шаарында элди таза суу менен камсыздоочу суу кампасынын ачылышында билдирди.
Атамбаев суу кампасынын ачылышында атайын даярдалган докладды окуудан баш тартты.
Президент өз сөзүндө жамандыкты амандык жеңе турганын, ынтымак, биримдик, бийлик таза болсо өнүгүү боло турганын айтты. Ал ошондой эле Баткен облусунда салынып жаткан жолдун абалы менен таанышарын белгиледи.
"Исфанадан Баткенге чейин салынып жаткан жолду өзүм да бүгүн текшерем. Мурда жолдун абалы начар болгондуктан, жөн машина эмес, жол тандабастардын дөңгөлөктөрү да жарылчу", — деди ал.
Мамлекет башчы 4-октябрда боло турган шайлоодо эл добушун сатпай, татыктууларды чын ыкластан тандап алууга чакырды.
"Добушту аракка, бешбармакка сатпай балдардын келечеги үчүн татыктууларды тандап алышыбыз керек. Максим сыяктуулар алтын карта менен ойноп, биздин балдар четте карап турбашы керек. Бийликке уурулардын келүүсүнө жол берилбеши зарыл", — деди президент.
Сыйымдуулугу 700 кубга жеткен эки темир суу кампасы 17 миңден ашык жергиликтүү тургунду таза суу менен камсыз кылат.
Аталган долбоор 2013-жылы башталып, ага 108 миллион 880 миң сом кеткен. Долбоордун жалпы суммасынын 80 пайызы АРИС эл аралык уюму тарабынан, 10 пайызы өкмөт жана калган 10 пайызы Исфана шаар мэриясы тарабынан каржыланган.
