БИШКЕК, 13-сен. — Sputnik. Улуттук статистикалык комитет Кыргызстандын облустарында мал союунун көлөмү боюнча маалымат жарыялаган. Ага ылайык, Sputnik агенттиги эттүү облустардын рейтингин түзүп чыкты.
- Чүй облусу. Бул аймакта жарым жылдын ичинде 42 миң тонна эт өндүрүлгөн. Аталган облустун тургундары эттен башка жумуртка жана сүт азыктарын өндүрүү боюнча да алдыңкы орунда турат.
- Ош облусу. Алты айдын аралыгында 33 тонна эт алынган. Оштун жашоочулары сүт өндүрүүдө да экинчи орунда турса, жумуртканын саны боюнча үчүнчү сапты ээлеген.
- Жалал-Абад облусунда жарым жыл ичинде 25 миң тонна эт, 131 тонна сүт жана 33 миллион жумуртка чыккан.
- Нарын облусу. Бул аймактын эт боюнча көрсөткүчү 23 миң тоннага аз эле жетпей калган. Нарын болгону үч миллион жумуртка пайдаланып, бул жатта тизменин артында калган.
- Ысык-Көл облусунда союлган малдан 22 миң тонна эт алынган.
- Таласта статистика боюнча болгону 12 миң тонна эт өндүрүлгөн.
- Баткен облусу 12 миң тонна эт менен рейтингдин акыркы сабын ээлеген.
Кыргызстандын борбору Бишкек шаарында 125 тонна эт өндүрүлсө, Ошто бул көрсөткүч 602 тонна түзгөн. Жалпы Кыргызстан боюнча акыркы жарым жыл аралыгында 168 миң тонна эт өндүрүлгөн.
