БИШКЕК, 10-авг. — Sputnik. Президент Алмазбек Атамбаевдин жетекчилиги алдында Коргоо кеңеши диний экстремизм менен терроризмге каршы күрөшүү боюнча чараларды күчөтүүнү талкуулады. Бул туурасында президенттин маалымат кызматы билдирди.
Ал УКМК тарабынан бул боюнча жасалган кылмыштардын бетин ачуу, терроризм, экстремизмге каршы күчөтүлгөн иш-чараларга токтолду.
Мамасадыков бул жааттагы иштер Жакынкы Чыгыштагы жана Афганистандагы, Борбор Азия аймагындагы абалды эске алуу менен жүргүзүлүп жаткандыгын билдирди.
Атамбаев акыркы мезгилдери өлкөдө терроризм менен экстремизмдин алдын алуу, кыргызстандыктарды радикалдашкан уюмдардын катарына тартууга каршы туруу боюнча атайын дин саясатын жүргүзүүгө көңүл бурулуп жаткандыгын айтты. Мамлекет башчысынын айтымында, бул жаатта комплекстүү иш-чаралар зарыл жана ага каршы туруу үчүн бардык мамлекеттик органдар болгон күчүн жумшашы керек.
Өкмөткө экстремизм жана терроризм менен күрөшүүдө мамлекеттик органдарды финансылык жактан кошумча каржылоо милдети жүктөлдү. Андан сырткары укук коргоо органдарынын бул багыттагы ишинин натыйжасын арттырууга басым жасалды.
