Кыргызстанды чейрек кылымга жакын башкарган мамлекеттик жана коомдук ишмер Турдакун Усубалиев 96 жаш курагында дүйнө салды. Ал Кыргызстанды жетектеп турган... 07.09.2015, Sputnik Кыргызстан
Кыргызстанды чейрек кылымга жакын башкарган мамлекеттик жана коомдук ишмер Турдакун Усубалиев 96 жаш курагында дүйнө салды. Ал Кыргызстанды жетектеп турган жылдары өлкөнүн өнүгүшүнө өз салымын кошкон, андан сырткары, өлкөдөгү мамлекеттик кызматчылардын бир нече муунун тарбиялаган.
"Турдакун Усубалиевич 25 жылга жакын иштеп Кыргыз Республикасын айыл чарба мамлекетинен индустриалдык-агрардык өлкөгө айландырды. Ошол кездеги көрсөткүч боюнча бизди Советтер Союзундагы он беш республиканын ичинен үчүнчү орунга чыгарды",— дейт анын шакирттеринин бири Жамин Акималиев.
Улуу инсандын шакирттери жана кыргызстандыктар анын эң башкы эмгектеринин бири катары ошол кездеги Фрунзе, азыркы Бишкектеги бир катар ири курулуштарды түптөгөндүгүн айтып келишет.
Биз жогоруда Кыргызстан Компартиясынын Борбордук комитетинин биринчи катчысы Турдакун Усубалиевдин өмүр жолун чагылдырган сүрөттөрдү назарыңыздарга тартуулайбыз.
Кыргызстан компартиясынын жана Кыргыз ССРинин түзүлгөндүгүнүн 50 жылдыгына карата Достук аллеясында Турдакун Усубалиевдин катышуусундагы бак отургузуу салтанаты.
Кыргыз ССРинин түзүлгөндүгүнүн 50 жылдыгына карата СССР министрлер советинин төрагасы Алексей Косыгиндин Кыргызстанга келиши. Аны менен Кыргыз ССРинин Жогорку Советинин президиумунун төрагасы Төрөбай Кулатов жана Кыргызстан КП БКнын 1-катчысы Турдакун Усубалиев кошо жүрөт.
