БИШКЕК, 7-сен. — Sputnik. Кыргыз-тажик мамлекеттик чек арасында көзөмөл күчөтүлгөнүн Мамлекеттик чек ара кызматы билдирет.
Маалыматка ылайык, мындай чара Тажикстандагы кырдаалга байланыштуу көрүлүүдө.
Тажикстандын Ички иштер министрлиги кабарлаганы боюнча, Душанбе шаарында жана Вахдат шаарында бир нече ирет кол салуу болуп, андан ИИМ, Коргоо министрлигинин 33 кызматкери жана мурдагы министрдин орун басарынын жактоочуларынан турган топтун тогуз кишиси өлгөн. ИИМдин маалыматына ылайык, кол салууну Коргоо министринин мурдагы орун басары, "кылмыш иштери" үчүн президент тарабынан жума күнү кызматтан алынган Абдухалим Назарзода башкарган.
Учурда аймакка кошумча чек ара бөлүктөр тартылып, жеке коопсуздук чаралар күчөтүлдү. Мындан тышкары эки мамлекеттин чек арачыларынын өз ара ыкчам маалымат менен алмашуусу активдештирилди.
Кыргыз-тажик чек арасындагы өткөрүү пункттары ушу тапта кадимки тартипте иштеп жатат. Мамлекеттик чек ара кызматы Тажикстандагы жана өлкөнүн Кыргызстан менен чектешкен аймактагы кырдаалды көзөмөлдөп жатканын эскертет.
