БИШКЕК, 3-сен. — Sputnik. КМШ өлкөлөрү батыштан чыккан товарларды сатып алуу менен өз мамлекетинин эмес, өнүккөн өлкөлөрдүн экономикасын колдоп жатат деген пикирин россиялык саясат таануучу Сергей Михеев Бишкекте "Евразиялыктар — жаңы толкун" фонду уюштурган конференцияда билдирди.
Анын сөзүнө караганда, ата мекендик өнөр жайга карата туура эмес, кайдыгер мамиленин айынан ири заводдор жоюлуп кеткен.
"Алып сатарлык көз караш менен жашоого болбойт. Бирок биздин рыноктор телефондордон баштап ич кийимге чейин батыштын товарларына жык толгондуктан, КМШ өлкөлөрү ар бири өзүнчө өнөр жайды кайра бутуна тургуза албайт", — деп баса белгиледи Михеев.
Экономикалык саясат акча табуу жана өндүрүштү өнүктүрүү деген эки максатты сөзсүз айкалыштыруусу зарыл дейт ал.
"ЕАЭБдин алкагында Кыргызстандын коомдук-саясий жана экономикалык өнүгүүсү" деп аталган конференцияга кыргыз жана россиялык саясий жана экономикалык эксперттер катышууда.
