БИШКЕК, 28-июль — Sputnik. Кыргызстанда 2015-жылдын 2-сентябрынан баштап ыктыярдуу патенттин негизиндеги иштин түрлөрү 124төн 81ге чейин кыскарат. Ыктыярдуу патенттин негизинде салыктын түпкү суммасын бекитүү тууралуу тиешелүү токтомго премьер-министр кол койгонун Мамлекеттик салык кызматы билдирет.
Экономикалык иштердин мамлекеттик классификациясына ылайык, документ ыктыярдуу патенттөөнүн негизиндеги ишкердиктин түрлөрүн иретке салат жана системалаштырат. Мындан тышкары, товарларды чекене сатуу чектелди.
"Ыктыярдуу патенттин негизиндеги салыктардын базалык суммаларын бекитүү учурунда, салык төлөөчүлөрдүн жана бизнес-коомчулуктарынын сунуштары, салык органдары тарабынан жүргүзүлгөн эсептөөлөр эске алынган. Азыркы учурда аймактык салык органдары тарабынан ыктыярдуу патенттин негизиндеги салыктардын суммасын белгилөө боюнча иштер жүрүп жатат", — деп айтылат билдирүүдө.
Ыктыярдуу патенттин негизинде салыктардын базалык суммасы, 2013-2017-жылдарга КР туруктуу өнүктүрүүнүн Улуттук стратегиясын аткаруунун алкагында, ошондой эле ыктыярдуу патенттин негизинде ишмердиктерин жүзөгө ашырышкан субъектилерине салык салууну оптимизациялоо максатында бекитилген.
