БИШКЕК, 13-июнь — Sputnik. "Айыл чарбасын каржылоо-3" долбоорунун алкагында быйыл беш айда 6207 айыл-чарба товарларын өндүргөн фермерлерге 2 млрд. 352 млн. 943 миң сом насыя берилген. Бул тууралуу Каржы министрлигинин маалымат кызматы билдирди.
Жеңилдетилген насыялар негизинен мал чарбачылыгы, айыл чарба продукцияларын кайта иштетүү, асыл тукум мал өстүрүү тармактарына берилген.
"Айыл-чарбасын каржылоо-3" долбоорун ишке ашыруу максатында фермерлерге жеңилдетилген насыя берген коммерциялык банктардын жана каржы-насыялык мекемелердин чыгымдарын жабуу үчүн республикалык бюджеттен 2015-жылы 210 миллион сом бөлүү жана 2016-жылы 120 миллион сом бөлүү каралууда.
2015-жылдын январь-май айларында "Айыл-чарбасын каржылоо-3" долбоорун субсидиялоо үчүн республикалык бюджеттен 160,4 миллион сом бөлүнгөн.
