БИШКЕК, 29-мар — Sputnik. Апрель айында Кыргызстанда Шанхай кызматташтык уюмуна мүчө өлкөлөрдүн атайын топторунун машыгуулары өтө тургандыгын билдирди КРдин Куралдуу күчтөрүнүн Башкы штабынын маалымат кызматы.
25-26-мартта Токмок шаарындагы 52806-аскер бөлүгүнүн алкагында ШКУга мүчө өлкөлөрдүн куралдуу күчтөрүнүн атайын топтору биргелешкен машыгууларды өткөрө тургандыгы жөнүндө сүйлөшүүлөр өттү.
Биргелешкен окууларды уюштуруу маселелерин талкуулоо үчүн Бишкекке Казакстан, Кытай, Россия жана Тажикстан мамлекеттеринен тийиштүү министрликтер менен ведомстволордун оперативдүү топтору келди.
Сүйлөшүүнүн жүрүшүндө 21-25-апрель күндөрү "ШКУга мүчө мамлекеттердин куралдуу күчтөрүнүн атайын топторунун жардамы менен тоолуу шарттарда бандалык түзүмдөргө бөгөт коюу жана аларды жок кылуу" деп аталган биргелешкен машыгуулардын милдет-максаттары жана тартиби талкууланып макулдашылды. Мындан сырткары, биргелешкен машыгууну камсыз кылуунун укуктук, материалдык-техникалык, оруктук, унаа, медициналык жана башка маселелери каралды.
Башкы штабда ШКУга мүчө мамлекеттердин куралдуу күчтөрүнүн атайын топторунун биргелешкен машыгуусу Шанхай кызматташтык уюмуна мүчө өлкөлөрдүн коргоо министрликтеринин 2014-2015-жылдарга карата планына ылайык өтө тургандыгын белгилешти.
