Кыргызстан жана Башкыртстан башчылары кызматташууну өнүктүрүүнү талкуулашты

Бишкек, 5-мар. — Sputnik. Президент Алмазбек Атамбаев Башкыртстандын башчысы Рустэм Хамитов менен жолукту.

Жолугушуунун жүрүшүндө президент Атамбаев жана Хамитов түрдүү чөйрөлөрдө эки тараптуу кыргыз-башкырт мамилелеринин ыкчам өнүгүүсүн талкуулашты. Андан сырткары маданияттар аралык жана иштиктүү байланыштардын активдешүүсү белгиленип, эки тараптуу өз ара кызматташуунун түрдүү тармактарында долбоорлорду ишке ашыруу боюнча пландар айтылды.

Кыргызстандын президенти эки элдин ортосундагы маданий-тарыхый байланыштарды эске алып, Россиянын региондору менен түздөн-түз байланышууну жөнгө салуунун маанилүүлүгүн белгиледи.

Башкыртстандын башчысы эки тарап үчүн кызыктуу болгон түрдүү чөйрөдө, анын ичинде айыл чарба тармагында биргелешкен пландардын бар экендигин билдирди. 

"Биздин ишкерлерибиздин, бизнесибиздин өз ара мамилелеринде ай сайын кызыктуу жакшы окуялар болуп турат, Кыргызстан менен Башкыртстандын ортосунда дайыма алмашуу жүрүп турат. Искусство, маданият, илим жаатын бекемдөө – бул түпкү негиз, андан кийин экономика болот. Ал эмитен эле күч ала баштады ", — деди ал. 

Атамбаев жана Хамитов Кыргызстандын Евразия экономикалык биримдигине кошулуусу кеңири тармактагы маселелер боюнча эки тараптуу мамилелердин жаңы келечегине жол ачарын белгилешти. Алар кыргыз-башкырт байланышын андан ары өнүктүрүү жана кеңейтүү үчүн оңтойлуу шарттарды түзөлө баштаганын билдиришти.