БИШКЕК, 23-янв — Sputnik. "Ростех" мамлекеттик корпорациясына кирүүчү, Россиянын оптикалык-электрондук тармагындагы негизги ишканаларды бириктирип турган Shvabe холдинги товарлар менен кызматтардын Эл аралык классификациясынын 16 классы боюнча Кыргызстанда товардык белгисин кириллица жана латиница менен каттоодон өткөрдү деп билдирет компаниянын маалымат кызматы.
"Бул кадамдын аркасы менен Shvabe КРде илимий изилдөө жүргүзүү, тажрыйбалык-конструктордук иш-аракеттерин жасоо, окуу жана өнөр жай талдоо иштерин аткаруу мүмкүнчүлүгүнө ээ болду. Холдингдин медициналык продукция, жарыктандыруу техникасын, геодезиялык жана оптикалык жабдууларды чыгаруу укугу пайда болду", — деп айтылат компаниянын билдирүүсүндө.
Shvabe акционердик коомунун башкы директорунун сатуу, тышкы экономикалык ишмердик жана маркетинг боюнча орун басары Анатолий Слудных Кыргызстан КМШ өлкөлөрүнүн ичинен компаниянын артыкчылык орундагы өнөктөштөрүнүн бири деп белгиледи.
"КР менен биздин компаниянын ишкердик кызматташтыгы узак убакыттан бери жана тыгыз жүрүп келе жатат. Shvabe компаниясынын биринчи медициналык продукциясы дал ушул өлкөгө сатылган болчу. Бул мамлекет — жакынкы чет өлкөлөрдүн ичинен алгачкы өнөктөштөрүбүздүн бири", — деди Слудных.
Shvabe чыгарган жарыктандыргыч диоддуу заманбап светофорлор, үнөмдүү жана жогорку технологиялык, сырткы жарыктандыруучу прожекторлор республикада жакшы колдонулат.
