Кытайда жигит сүйүктүүсү каза болгондон кийин ага үйлөндү

БИШКЕК, 24-окт. — Sputnik. Кытайдын Далянь шаарынын тургуну 35 жаштагы Сюй Шинань сүйүктүүсү Ян Люнун тажыясында ага үйлөнүү салтанатын өткөрдү. Бул тууралуу Daily Mail басылмасы жазды.

Шинань менен Лю 2007-жылы эле таанышып, бири-бирине ашык болуп калышкан. Алар университетте окушканы менен көпкө дейре интернет аркылуу жазышып жүрүшкөн. 2013-жылы августта жубайлар никесин расмий каттатып, үйлөнүү тойго кам көрө башташкан.

Бирок үч айдан кийин 28 жаштагы Лю көкүрөгү катуу ооруп жатканын айтып, ооруканага кайрылган. Дарыгерлер ага ракка кабылганын айтышкан. Үйлөнүү тойду кийинкиге жылдырууга туура келген. Лю көптөгөн операцияларды жасатып, химиялык жол менен бир нече жолу дарыланган. 2017-жылы анын абалы бир аз жакшыргандан кийин түгөйлөр батир алууга жана үйлөнүү тоюн өткөрүү үчүн акча чогулта башташкан. Бирок жыл айланбай эле Люнун оорусу күчөп кеткендиктен алар көптөн күткөн тилегине жетпей калышкан. 2019-жылдын май айында аялдын ден соолугу кескин начарлап, ооруканага түшүп, июль айында төшөккө жатып калган. Тилекке каршы, октябрдын ортосунда бул дүйнө менен кош айтышкан.

Кайгыга муунган Шинань сүйүктүүсү аны акыркы күндөрү тааныбай калгандыктан өлөр алдында жакшы коштошо албаганын айтып, арман кылган. Аялынын өлүмүнөн кийин сүйүктүүсү ооруканага түшөр алдында интернеттен үлпөт көйнөгүн издегенин билген. Ал ага эң кооз көйнөктү сатып берүүгө сөз берген. Аялы каза болгондун эртеси ага баш кошууну чечкен.

Көйнөк саткан дүкөндүн ээси Шинандын башынан өткөндөргө абдан таасирленип, каалаган үлпөт көйнөктү бир юанга сатарын айткан.

Люнун тажыясы болгон күнү Шинань ага баш кошуп, сүйүктүүсүнүн кыялын орундатканын билдирген. Шинань аялына анын сөөгүнүн алдында ыйлабоого сөз берген, бирок сөөгүн алып чыгып бараткан учурда жашын тыя алган эмес.