БИШКЕК, 3-апр. — Sputnik. Россиядагы Кыргызстандын элчилиги жардыруудан каза болгондордун жана жабыркагандардын арасында КР жарандарынын бар-жогун тактап жатат. Бул тууралуу элчиликтен билдиришти.
Алдын ала маалыматтар боюнча Санкт-Петербургдагы "Сенная площадь" жана "Технологический институт" метро станцияларында жардыруу болгон. Каза болгондордун саны боюнча маалыматтар такталып жатат. Алдын ала айтылгандар боюнча кеминде 10 киши каза болду. Кырсык тууралуу өлкө президенти Владимир Путинге дагы маалымат берилди.
Россиядагы Кыргызстандын элчилиги маалымдагандай, кырсык болгон жерге биринчи катчы, канцеляриянын кызматкерлери жана Санкт-Петербургдагы ардактуу консул чыгып кеткен.
