БИШКЕК, 17-ноя. — Sputnik. Мамлекеттик экотехинспециянын кызматкерлери укук коргоо органдары менен биргеликте карышкырды базарга алып чыккан жаранды издөөгө алды. Бул туурасында аталган инспекциянын маалымат кызматынан билдиришти.
Белгилей кетсек, кечээ, 16-ноябрда Баткендин Исфана шаарындагы мал базарга жергиликтүү тургун тирүү карышкыр алып чыккан. Сатып алууга кызыккандар көп болуп 10 миңден 25 миң сомго чейин баа беришкен. Бирок ээси сатпай кайра алып кетип калган.
"Карышкырды коомчулукка алып чыккан кишини издөө иштери жүрүп жатат. Табылгандан кийин жырткыч мамлекеттин жапайы жаныбарларды кармоочу жайына өткөрүлүп, ээси административдик жоопко тартылат. Кандай чара көрүлөрү табылгандан кийин белгилүү болот", — деп айтылат билдирүүдө.
Белгилей кетсек, карышкырга аңчылык кылууга мыйзам жол берет. Жырткычты атып келгендерге жергиликтүү бийликтин атайын сыйлыктары каралган.
Буга чейин борбор калаанын көчөлөрүндө жаш жигит арстандын күчүгүнүн мойнуна каргы тагып алып, элге аны менен сүрөткө түшүүнү сунуштап жүргөн. Кийинчерээк жаныбар "Бугу Эне" коомдук фондусуна өткөрүлүп берилген.
