БИШКЕК, 25-июн. — Sputnik. Жогорку Кеңештин депутаты Умбеталы Кыдыралиев "Маалыматты манипуляциялоо жөнүндө" мыйзам долбооруна каршы чыккандарга таң калды.
Аталган документте фейк-аккаунттарды өчүрүү, ЖМК же социалдык баракча аркылуу жалган маалымат тараткандарды соту жок эле жоопко тартуу сунушталган.
"Айткылачы, эмнеси жаман? Айтчу нерсесин өзүнүн атынан жазсын. Туура эмес болсо экинчи тарап сотко берет, баарынын укугу корголушу керек да. Бүт өнүккөн мамлекеттер фейк менен күрөшүп жатат. "Күрөш тандалма болуп калат, демократияга коркунуч жаралат" деп жатасыздар. Качан Кыргызстанда тандалма болду эле? Муну кайдан алдыңар", — деп таң калды Кыдыралиев.
Бул мыйзам долбооруна депутаттардын бир тобу каршы чыкты. Элвира Сурабалдиева эл оюн ачык айта турган аянтча интернетте гана болгондуктан аларды ооздуктоо сөз эркиндигин чектөө болорун билдирди.
Жанар Акаев бул иштебей турган мыйзам, жүзөгө ашса да бир тараптуу аткарылат деп эсептейт. Мындан улам араң турган коомчулукту кайра козгоп, бийликке нааразычылыкты күчөтпөөгө чакырды. Анын пикиринде, мыйзам бийликке жагынуу, шайлоодо тизмеге илешип калуу максатында жазылган.
Ал эми төрага Дастан Жумабеков менен депутат Камчыбек Жолдошбаев бул демилгени колдой турганын айтып, ушул укуктук норманын негизинде жарандар ар-намысын коргой алырын билдирди.
