Гимндин автору. Өзүнүн чыгармачылык жолунда ал ар кыл темаларга кайрылып, жан дүйнөсүнөн өткөрүп 20дан ашык ыр жыйнактарын чыгарган. Алсак, "Жайкы таңда", "Жоогазын", "Сырдашуу", "Сары-Өзөн", "Топ жылдыздар" китептери жарык көргөн. Анын калеминен жаралган ондогон ыр обонго салынып эл арасында ырдалып келет. Эң негизгиси Садыков Кыргыз Республикасынын мамлекеттик гимнинин сөзүн Шабданбек Кулуев менен чогуу жазган.
Көп кырдуу талант. Токтогул атындагы мамлекеттик сыйлыгынын лауреаты поэзия менен гана чектелбестен, драма жаатында жемиштүү эмгектенген. Ал "Манас" үчилтигинин негизинде "Манастын уулу Семетей", "Сейтек" драмасын жана түрдүү жанрдагы ондогон пьесаны жазган. Александр Пушкин, Михаил Лермонтов, Расул Гамзатов, Тарас Шевченко, Омар Хаям, Кайсын Кулиев жана Ясыр Шивазанын чыгармаларын дагы кыргыз тилине которгон.
Туулган күнүндө акыркы сапарга узаган. Садыковдун абдан жөнөкөй адам болгондугун айтышат. Драматург жаштардын чыгармачылыгына ар тараптан колдоо кылып Султан Раевге, Эгемберди Эрматовго, Меңди Мамазаировага устаттык кылып, жол көрсөткөн. Кыргыз Эл акыны өмүрүнүн аягына чейин калемин колунан түшүрбөй жүрүп, жети жыл мурда 78 жашында дүйнөдөн кайтып, туулган күнүндө жерге берилген.
