Кыргызстанда субсидияланган аба каттамдарынын саны көбөйтүлдү
© Фото / пресс-служба ОАО "Аэропорты Кыргызстана"
Жазылуу
БИШКЕК, 26-янв. — Sputnik. Asman Airlines компаниясы дотациялык аба каттамдарынын программасын кеңейтип, алардын санын көбөйттү.
"Кыргызстан аэропорттору" ААКтын маалымат кызматы билеттердин баасы белгиленгенин билдирди. Бул программа региондорду өнүктүрүүгө жана ички туризмди колдоого багытталган.
Маршруттар жана билеттердин баасы:
Бишкек — Талас: дүйшөмбү, жума, баасы — 2100 сом;
Бишкек — Нарын: дүйшөмбү, жума, баасы — 2100 сом;
Бишкек — Кербен: шаршемби, жума, баасы — 3600 сом;
Бишкек — Казарман: дүйшөмбү, жума, баасы — 3100 сом;
Бишкек — Баткен: аптасына 6 жолу (жума күндөн башка), баасы — 4500 сом;
Бишкек — Раззаков: жумасына 6 жолу, баасы — 4800 сом;
Бишкек — Каракол (кышында): шейшемби, бейшемби, жума, жекшемби, баасы — 4000 сом;
Ош — Каракол (кышында): шейшемби, бейшемби, баасы — 5000 сом.
Тарифтердин Бишкек — Ош жана Бишкек — Манас каттамдарына тиешеси жок экени айтылды.
Билеттерди Asman Airlines мобилдик тиркемеси аркылуу сатып алса болот.
Каттамдар өз баасынан арзан. Президент айырманы Турукташтыруу фондунун эсебинен жабууну тапшырган.
