Мамыралиев: көмүрдү белгиленген баасынан жогору саткан 56 факт катталды
09:53 22.01.2025 (Жаңыртылды: 09:54 22.01.2025)
© Sputnik / Арууке Амирдинова
Жазылуу
Монополияга каршы жөнгө салуу кызматынын төрагасынын орун басары Айбек Мамыралиев көмүрдүн наркына убактылуу мамлекеттик жөнгө салуу 15-февралга чейин узарганын маалымдады.
Көмүрдүн тоннасы Нарында 3 900 сом, ал эми Баткенде 12 000 сомдон сатылууда. Бул тууралуу Айбек Мамыралиев Sputnik Кыргызстан радиосунун эфиринде маек куруп жатып билдирди.
Мамыралиев: көмүрдү белгиленген баасынан жогору саткан 56 факт катталды
Анын айтымында, кара алтындын баасын көзөмөлдөө үчүн тийиштүү иш-аракеттер жүргүзүлүүдө.
"Быйыл көмүрдүн баасы боюнча нааразычылык болгон жок. Коюлган баа туруктуу сакталууда. Бирок ошол эле учурда жеке кызыкчылыгын көздөп көмүрдү белгиленген наркынан көтөрүп саткандар дагы бар. Бүгүнкү күндө республика боюнча 56 факт катталды. Бул былтыркы жылдын ушул мезгилине салыштырмалуу аз. Аларга эскертүүлөр, айып пулдар салынды. Айыптын көлөмү Бузуулар кодексинин 290-беренеси боюнча жеке жактарга 3 000 сом, юридикалык жактарга 13 000 сомду түзөт. Азыркы тапта көмүрдү коюлган баасынан жогору саткандар көбүнчө жеке жактар болууда. Ошондуктан аларга карата айыптын көлөмүн көбөйтүүнү карап жатабыз. Учурда эң төмөн баа Нарындын Жумгал районунда, тоннасы 3 900 сомдон сатылууда. Ал эми эң кымбаты 12 000 сом болуп Баткенде белгиленген. Баа көмүрдүн өздүк наркын, кеткен чыгымды, ишкердин пайдасын эске алуу менен коюлган. Кара-Кеченин чыккан жериндеги баасы тоннасына 2 260 сомду түзөт. Көмүр социалдык маанилүү товар болгондуктан баасына мамлекеттик жөнгө салуу былтыр 8-сентярда 90 күнгө кирген. Мөөнөтү ошол эле жылдын 25-декабрында аяктап, Экономика министрлигинин чечими менен ушул жылдын 15-февралына чейин узарды", — деди Мамыралиев.
Ал көмүрдүн баасын көтөрүп саткан ишкерлер болсо, арыз менен Монополияга каршы жөнгө салуу кызматына кайрылса болорун кошумчалады.
