Депутат Балбак Түлөбаев өкмөттүн салык саясатын сынга алды
11:33 04.12.2024 (Жаңыртылды: 11:34 04.12.2024)
Жазылуу
БИШКЕК, 4-дек. — Sputnik. Жогорку Кеңештин депутаты Балбак Түлөбаев өкмөттүн курулуш компаниялары үчүн киргизип жаткан 12 пайыз кошумча нарк салыгын (КНС) сынга алды.
Ал парламент жыйынында президенттик администрациянын жана министрлер кабинетинин парламенттеги өкүлү Алмасбек Абытовго кайрылды.
"Акыркы убакта өкмөт кызык абалга баратасыңар, салыктарды көбөйтүп баштадыңар. Жаңы салык кодексин, курулуш бизнесине 12 пайыз КНС алып келдиңер. Кыргызстанда элге 30 миллион чарчы метр үй керек. Мамлекеттик ипотека 2 миллион чарчы метр үй салып жатат, ага да шүгүр, бирок калганы кайдан алат? Мисалы, 3 миллион сомдук үй алыш үчүн, 12 пайыз КНС киргизсе, баасы 3,5 миллион сом болот. 500 миң сомду табыш үчүн байкуш кыргыз дагы канча иштеши керек. Булар үйлүү болобу же ушинтип эле жүрө береби? Үстүндө үйү жокторго тийбегиле да!" — деди Түлөбаев.
Эл өкүлү курулуш компаниялары үчүн 12 пайыз КНС киргизилсе турак жай кымбаттай турганын билдирди.
Азыркы тапта Жогорку Кеңеште Салык кодексине өзгөртүүлөр каралууда. Анда кыймылсыз мүлккө салык мындан ары 120 чарчы метрден жогору болгон үйлөргө дагы төлөнөрү айтылып, мындан тышкары, бир катар сунуштар талаш жараткан.
