Муниципалдык инспекция шаардын көркүн бузгандарга 7,8 млн сом айып пул салды
© Sputnik / Асель Сыдыкова
Жазылуу
Бишкек мэриясынын муниципалдык инспекциясынын башчысынын орун басары Бекзат Алтаев аталган кызматтын аткарган иштеринин жыйынтыгы тууралуу айтып берди.
Муниципалдык инспекциянын кызматкерлери тарабынан 2024-жылдын 26-февралына чейин 5844 чарба жүргүзүүчү субъект текшерилди. Анын 842сине Бузуулар жөнүндө кодекстин негизинде протокол түзүлүп, 7 миллион 863 миӊ 500 сом айып пул салынды. Бул тууралуу Бекзат Алтаев Sputnik Кыргызстан радиосунун эфиринде маек куруп жатып билдирди.
Муниципалдык инспекция шаардын көркүн бузгандарга 7,8 млн сом айып пул салды
Анын айтымында, 2024-жылдын 1-январынан тартып Бишкек шаарынын мэриясына пилоттук долбоордун алкагында абанын сапатын көзөмөлдөй турган ыйгарым укуктар берилген.
"Кыш мезгилинде чарба субъектилеринин тегерек-четин кар-муздан тазалоо иштери боюнча жалпысынан 524 жер текшерилип, көрктөндүрүү эрежелерин бузгандарга карата 37 протокол түзүлүп, 361 миӊ сом айып пул салынды. Муниципалдык инспекция тарабынан үстүбүздөгү жылдын 8-январынан тартып 22-февралга чейин жеке жана юридикалык жактардын өндүрүш, катуу тиричилик калдыктарын чыгаруу максатында "Тазалык" муниципалдык ишканасы менен 3 миллион 184 миӊ 964 сомго 224 келишим түзүлдү. Келишими жокторго 47 протокол түзүлүп, 391 миӊ сом айып пул өндүрүлдү. Курулуш аянтчаларындагы көчөлөрдү же жолдун өтүүчү бөлүгүн булгагандарга Укук бузуулар кодексинин 177-беренесине ылайык 18 протокол жазылып, 383 миӊ сом айып пул салынды. Шаардын калктуу конуштарында баракча, плакат жана башка маалымат билдирүүлөрүн белгиленбеген жерлерге чаптап, илген тараптарга 118 протокол түзүлүп, 333 миӊ сом айып пул салынды. Белгиленбеген жерлерге турмуш-тиричилик жана өндүрүштүк таштандыларды ыргыткан 171 тарапка 2 миллион 220 миӊ сом айып пул жазылды. Ал эми Бишкек шаарындагы 34 базар жана 50 чарба субъектинин тегерек-четинин санитардык абалы, кар-муздан тазалоосу текшерилип, жыйынтыгында төрт протокол түзүлдү. Аларга 52 миӊ сом айып пул салынып, 22 билдирүү баракчалары таратылды. Бул аралыкта жеке жана юридикалык жактардын уруксат кагаздары жок жер казуу жумуштарын жүргүзгөн 44 учуру аныкталып, аларга 611 миӊ 500 сом айып пул салынды. Муниципалдык инспекциянын кызматкерлери таштанды өрттөө жана тыюу салынган заттарды жагууну ооздуктоо үчүн 121 рейд уюшутуруп, жалпысынан 416 мончо, сауна, чарба субъектилери текшерилип, 12 протокол түзүлүп, 167 миӊ 500 сомго айып пул жазылды", — деди Алтаев.
Ал Бишкек шаарында жалпысынан 346 мончо, сауна болсо, анын 229у көмүр, 45и газ жана электр энергиясы менен жылытылып, 72 объект иштебей калганын кошумчалады.
