Ош шаарында таш симпозиуму өткөрүлөт. Чоо-жайы
© Sputnik / Асель Сыдыкова
Жазылуу
Маданият, маалымат, спорт жана жаштар саясаты министрлигинин Искусствону өнүктүрүү башкармалыгынын башкы адиси Нурийла Айдарова иш-чара айкелчилердин эмгегин даңазалоо экенин айтты.
Кыргыз Республикасынын эгемендүүлүгүнүн 32 жылдыгына жана көрүнүктүү мамлекеттик ишмер Насирдин Исановдун 80 жылдык мааракесине карата "Тарыхтан калган элестер" аттуу таш айкелдердин мыкты эскизин тандоо үчүн республикалык сынак жарыяланды. Бул тууралуу Нурийла Айдарова Sputnik Кыргызстан радиосунун эфиринде маек куруп жатып билдирди.
Ош шаарында таш симпозиуму өткөрүлөт. Чоо-жайы
Анын айтымында, сынакта катышуучулардын ичинен 17 эмгек тандалып, таш айкелдер жасалып, жайдын аягында Ош облусунда ачылышы болот.
"Быйыл таш симпозиуму Ош облусунда өткөрүлөт. Маданият, маалымат, спорт жана жаштар саясаты министрлиги менен Ош мэриясы аталган иш-чараны уюштуруп жатат. Жобо боюнча таш айкелдер Ош шаарына жайгашат. Сынактын негизги максаты кыргыз элинин байыртан келе жаткан тарыхый-маданий мурасын айкелчилердин чеберчилиги менен чагылдырып, Ош шаарына эстеликке калтыруу үчүн айкелчилердин эмгектеринин эң мыкты эскизин тандап алуу, айкелчилердин идеяларынын биримдигинде улут мурасын жана айкелчилердин эмгегин даңазалоо, коомдогу активдүүлүгүн жогорулатуу болуп саналат. Сынакка скульптура багытында билими бар жаран катыша алат. Бир автор, автордук жамаат конкурстун катышуучусу боло алат. Сынакка жөнөтүлгөн эскиздер маңыздуу келип, берилген тематиканы чагылдырышы керек. Катышуучулардын жашы чектелбейт, каалагандар өтүнүч кат менен министрликке кайрылуусу зарыл. Катышуучу бир гана таш композиция жасай алат. Сынак жашыруун өткөрүлөт жана катышуучулардын аты-жөнү жыйынтыкталганга чейин ачыкталбайт. Жеңүүчүлөр QR-код үчүн өзүнүн жасаган айкелинин маани-маңызы, философиясы, максаты жөнүндө 10-июлга чейин жазып берүүсү шарт. Эскиздер министрликтин көркөм эксперттик комиссиясы идеянын оригиналдуулугу жана көркөм образдын толук ачылышына, эстетикалык таасир берүү деңгээлине жана сапаттуу, көркөм аткаруусуна карап, баалашат", — деди Айдарова.
Ал жеңүүчүлөр кызыктыруучу акчалай сыйлык жана грамота менен сыйланарын кошумчалады.
