Иманкулова: №98 кесиптик лицей студенттерди 25 адистик боюнча окутат
Жазылуу
№98 байланыш жана маалымат технологиялары кесиптик лицейинин директору Нурисат Иманкулова аталган окуу жай 25 адистик боюнча билим берерин айтты.
№98 байланыш жана маалымат технологиялары кесиптик лицейи 9-11-класстын базасында окуучуларды кабыл алат. Окуу жайга кирүү үчүн ЖРТ баллы талап кылынбайт. Окуучулар ички тестирлөөнүн жыйынтыгы боюнча кабыл алынат. Бул тууралуу Нурисат Иманкулова Sputnik Кыргызстан радиосунда маек куруп жатып билдирди.
Иманкулова: №98 кесиптик лицей студенттерди 25 адистик боюнча окутат
Анын айтымында, бул жылы абитуриенттер башталгыч кесиптик лицейге онлайн кабыл алынат.
"№98 байланыш жана маалымат технологиялары кесиптик лицейи IT тармагындагы адистерди даярдап келет. Бул сфера абдан тез өнүгүп, өзгөрүп тургандыктан окуу жай жаңы адистиктерди (графикалык дизайнер) кошуп жатат. Ошондой эле иш берүүчүлөр да адистер кыска убакыттын ичинде даярдалып чыгышына кызыкдар болуп, жумушка алууда биздин бүтүрүүчүлөргө артыкчылык берүүдө. Биз региондордогу башталгыч кесиптик лицейлер менен алакабыз бар. Ал жактагы окуучулар биздин базада окуп, IT адистери даярдалып жатат. Лицейдин окуу техникалык базасы дайыма жаңыланып турат. Бирок IT адистердин негизги окуу куралы бул ноутбук болуп эсептелет. Андыктан азыркы учурда болочок программист, веб-дизайнерлердин 50 пайызынын өздөрүнүн ноутбугу бар. Лицейде 25 адистик (тогуз адистик – 10 ай окутулуп, диплом берилет) боюнча билим берилет. Бизде окутуунун узактыгы 10 ай – узак мөөнөттүү жана 1-3 ай – кыска мөөнөттүү курстар. Ал эми келишимдик окуунун баасы 45 миң сомду түзөт. Бул ошол программист, байланыш, системалар менен иштеген адистерди даярдоого кетчү чыгым. Кабыл алуу үчүн аттестат, № 086/У медициналык маалымкат, жашаган жери тууралуу маалымкат, сүрөт 3х4 (4 даана), паспорттун же туулгандыгы тууралуу күбөлүктүн көчүрмөсү, ата-энесинин паспортунун көчүрмөсү керектелет", — деди Иманкулова.
Ал мүмкүнчүлүгү чектелген, ата-энеси жок балдар акысыз билим аларын, ал эми көп балалуу жана социалдык жактан турмушу начар үй-бүлөлөр Соцфонддон маалым кат алып келсе жеңилдиктер берилерин кошумчалады.
