Мамырова: кесиптик лицейлерге окууга тапшыруу биринчи жолу онлайн өтөт
Жазылуу
Билим берүү жана илим министрлигинин Башталгыч кесиптик билим берүү башкармалыгынын башчысы Гүлнура Мамырова Кыргызстанда жалпысынан 99 кесиптик лицей бар экенин айтты.
Кыргызстанда кесиптик лицейлерге абитуриенттерди кабыл алуу биринчи жолу онлайн режиминде жүргүзүлөт. Окууга тапшыруу үчүн 2020.edu.gov.kg платформасына кирип документтерди тиркөө керек. Кабыл алуу үчүн паспорт же туулгандыгы тууралуу күбөлүк, мектепти аяктагандыгы тууралуу аттестат же негизги жалпы билим жөнүндө аттестат талап кылынат. Бул тууралуу Гүлнура Мамырова Sputnik Кыргызстан радиосунда маек куруп жатып билдирди.
Мамырова: кесиптик лицейлерге окууга тапшыруу биринчи жолу онлайн өтөт
Анын айтымында, окууга онлайн катталуу кабыл алуу процессин жеңилдетет жана адам фактору жок болгондуктан паракорчулукка бөгөт коет.
"Бүгүнкү күндө башталгыч кесиптик билим берүү системасы даярдаган адистерге суроо-талап өсүүдө. Изилдөөлөр көрсөткөндөй, 2022-жылы куруучу, слесарь, автомеханиктерге болгон муктаждык жогору бойдон калууда. Кыргызстанда жалпысынан 99 кесиптик лицей болсо, анын алты кесиптик училищеси Жаза аткаруу мамлекеттик кызматына караштуу түзөтүүчү билим берүү системасына кирет. Кесиптик лицейлерде билим алган окуучулардын 20 пайызы тамак-аш инженерлигинде, дагы 20 пайызы курулуш тармагында, 24 пайызы жеңил өнөр жайда, 19 пайызы транспорт секторунда жана 15 пайызы айыл чарба адистигине окуйт. Акыркы жылдары маалымат технологиясы тармагында окууну каалагандардын саны өсүүдө. Жалпысынан башталгыч кесиптик билим берүү системасында 34 миңдей окуучу окуйт. Кыргызстанда кесиптик лицейлерге абитуриенттерди кабыл алуу биринчи жолу онлайн режиминде 15-июлда башталат. Бардык багыттагы кесиптер бюджеттик негизде окутулат, бирок келишимдик орундар да бар. Эскерте кетчү жагдай, ар бир адистик боюнча группага алгач жеңилдик каралган 10дон бала кабыл алынат. Калган окуучулар эгер атаандаштык жогору болсо, аттестатындагы бааларынын орточо баллы чыгарылып, мектепте жакшы окугандар алынат. Кыргызстанда 2020-жылдан тарта ЖОЖдорго кабыл алуу 2020.edu.gov.kg бирдиктүү порталы аркылуу жүргүзүлөт. Сайттан университет, колледждерден тышкары лицейлер, андагы адистиктер жана окуу акысы тууралуу маалымат алса болот. Андан сырткары, ЖМКларга окууга онлайн тапшыруунун инструкциясы көрсөтүлгөн кыргыз, орус тилдериндеги видеороликтер жайгаштырылат", — деди Мамырова.
Ал жаңы окуу жылында кесиптик лицейлерге 15-16 миң студентти кабыл алуу пландалып жатканын кошумчалады.
