Мамбеталиева: өлкөдө коронавируска каршы жамааттык иммунитет пайда болду
13:01 07.07.2022 (Жаңыртылды: 14:54 07.07.2022)
Жазылуу
Санитардык-эпидемиологиялык көзөмөл департаментинин жугуштуу, паразитардык оорулардын жана эпидемиологиялык көзөмөлдөө башкармалыгынын эпидемиологу Айнура Мамбеталиева чектөөнүн алынышы пандемиянын бүткөнүн билдирбей турганын айтты.
Өлкөдөгү коронавирус боюнча эпидемиологиялык кырдаал жакшырганына байланыштуу Саламаттык сактоо министрлиги ооругандар тууралуу бир жумалык статистикалык маалымат бере баштады. Айрым күндөрү оорулуулар таптакыр катталган жок. Бул тууралуу Айнура Мамбеталиева Sputnik Кыргызстан радиосунда маек куруп жатып билдирди.
Мамбеталиева: өлкөдө коронавируска каршы жамааттык иммунитет пайда болду
Анын айтымында, кургак учук менен ооруган адам COVID-19ду жуктуруп алса илдетти оор көтөрөт. Андыктан алар COVID-19га каршы эмдөөдөн өтүшү зарыл.
"Акыркы күндөрү Кыргызстанда коронавирус илдетине чалдыккандардын саны өсүүдө. Акыркы бир жуманын ичинде өлкөдө COVID-19дун жаңы 48 учуру катталды. Алардын 43ү Бишкекте болсо, Чүй облусунда төрт, Ош калаасында бир бейтап аныкталды. Булардын ичинен тогузу РФ, Түркия, Өзбекстан, АКШ мамлекеттеринен келген. Учурда ички миграция күчөгөн, эл көп жашаган аймактарда илдет аныкталууда. Азыр эми элдин басымдуу бөлүгү коронавирус менен ооруп айыкты, вакцинация өнөктүгү жүрүп жатат. Мындайча айтканда коллективдүү иммунитет пайда болду. Андыктан кийинки толкун оор болбойт. Болгону тобокелдик тобундагы жаш балдар, кары-картаңдар, өнөкөт оорусу барлар алдын алуу чараларын көрүп, иммунитетин чыңдап, вакцинанын эки дозасын, аны алгандар бустердик дозасын сайдырып койгону оң. Мисалы, кургак учук менен ооруган адам COVID-19ду жуктуруп алса илдетти оор көтөрүп, кыйналышы мүмкүн", — деди Мамбеталиева.
Ал көптөгөн өлкөлөрдө коронавируска каршы чектөөлөрдүн алынышы пандемия бүттү дегенди билдирбей турганын, ДССУ өзгөчө абалды жойбогонун эскертип, мындан улам эмделүү зарыл экенин кошумчалады.
