БИШКЕК, 22-дек. — Sputnik. Доллардын кымбатташына коронавирустун жаңы штаммынын жайылышы себеп болду. Бул тууралуу Кыргызстандын Улуттук банкынан кабарлашты.
Бүгүн эртең менен акча алмаштыруучу жайларда доллар 80,9 сомдон сатып алынып, 81,3 сомдон сатылып жаткан. Бирок кечке жуук 82,46 (сатып алуу) жана 82,84 (сатуу) сомго чейин кымбаттады.
"Кыргызстанда акча калкыма режиминде болгондуктан курстун өзгөрүүсү кадыресе эле көрүнүш. Учурда коронавирустун жаңы штаммынын пайда болушунан улам доллар дүйнө жүзүндө, Кыргызстан менен өнөктөш мамлекеттерде дагы кунун бекемдеп жатат", — дешти башкы банктан.
"Акчанын баасы суроо талапка ылайык аныкталган мамлекеттерде валюта курсунун божомолу жөнүндөгү суроолор байма-бай берилип турат. Бирок бир дагы борбордук банктар, анын ичинде КРдин Улуттук банкы акча баасы боюнча божомолдорду жарыялабайт", — деп белгилешти Улуттук банктан.
Коронавирустун жаңы штаммы
14-декабрь күнү Улуу Британиянын саламаттык сактоо министри коронавирустун жаңы штаммы аныкталганын, ал азыркыга салыштырмалуу 70 пайызга тез жугарын айтып чыккан.
