БИШКЕК, 15-дек. — Sputnik. Кыргызстандын башкаруу формасын аныктоо үчүн өткөрүлө турган референдумдун бюллетенинде үч позиция жазылат. Бул туурасында Борбордук шайлоо комиссиясынын төрайымынын орун басары Абдыжапар Бекматов билдирди.
Ага ылайык, бюллетендеги "Кандай мамлекеттик башкаруу формасын тандайсыз?" деген суроонун алдына төмөнкүлөр жазылат:
- Президенттик;
- Парламенттик;
- Баарына каршы.
Жарандар ушул үч позициянын тушундагы квадрат түрүндөгү аянтчаны белгилөө менен өзүнүн тандоосун билдирет. Ал бир гана позицияга тиешелүү белгини коюшу керек, экөөнө коюлуп калса бюллетень жараксыз деп таанылат.
Ошону менен катар Бекматов шайлоо урналары жетиштүүбү деген суроого дагы жооп берди.
"Ар бир шайлоо участкасына экиден автоматтык түрдө эсептөөчү урналар коюлат. Өлкөдө 2473 шайлоо участкасы ачылат. Учурда бизде 5716 урна бар. Демек ар бирине экиден бергенде дагы бизде ашып калат. Ал урналарды техникалык мүчүлүштүктөр жаралган учурда колдонуу үчүн даярдап турабыз", — деди Бекматов.
14-декабрга карата БШКга 3 552 582 шайлоочу катталган. Жыйынтыгы жокко чыгарылган 4-октябрдагы парламенттик шайлоодо 1 971 948 жаран же 55,96 пайызы добуш берүүгө келген. Референдум өттү деп таанылышы үчүн шайлочулардын 30 пайызы катышышы керек.
