Дарыгер неврологиялык ооруну шарттаган негизги факторлорду атады
Азыр Кыргызстанда ар бир бешинчи кишинин кан басымы жогору, бирок көбү аны сезбейт. Мындай көрүнүш бара-бара нерв ооруларына же инсультка алып келиши мүмкүн. Бул тууралуу Кундуз Карбозова Sputnik Кыргызстан радиосунун эфиринде маек куруп жатып билдирди.
Анын айтымында, учурда неврологго адамдар менингит, энцефалит, жүлүндүн оорулары жана неврит менен кайрылышууда.
"Неврологиялык оорулардын бир нече себеби бар. Буга кыймылдын аздыгы да кирет. Андан тышкары, туура эмес тамактануудан улам кан тамырлардын ичинде май пайда болуп, ал жүрөктүн ар кандай ооруларын шарттап жатат. Негизи бул майлар өз деңгээлинде болушу керек. Эгер кан айлануу начарласа баш мээнин өнөкөт оорулары пайда болот. Ошону менен бирге кант диабети да неврологиялык ооруларга алып келет. Ал эми дүйнөлүк статистиканы карап көрсөк, эркек кишилер инсульт, жүрөк ооруларына көбүрөөк чалдыгышат. Бул эркек жана аял кишинин гармондорунун өзгөчөлүгүнөн болушу ыктымал. Жаштарга караганда 60тан ашып калган кишилер инсульт жана жалпы неврологиялык оорулар менен көбүрөөк ооруйт. Бул нерсени өзгөртө албайбыз, бирок жогорудагы саналган нерселерди эске алып, туура жашоо образын кармансак неврологиялык ооруларды алдын алабыз", — деди Карбозова.
Невролог баш ооруган учурда дары ичип ооруну басып коюп жүрө бербестен дарыгерге кайрылуу керектигин кошумчалады.
