БИШКЕК, 26-июл. — Sputnik. Кыргызстандын Россиядагы элчиси Аликбек Жекшенкулов 24-июлда кыргыз диаспораларынын лидерлери жана активисттер менен жолугушту. Бул туурасында элчиликтин маалымат кызматы кабарлады.
Иш-чарага 70тен ашык кыргыз диаспораларынын өкүлдөрү жана уюмдардын жетекчилери, 44 кыргыз аймактык ассоциацияларынын башчылары жана активисттери катышкан.
Пандемия маалында Кыргызстандан Россияга учуп кетүүнүн жол-жобосу айтылды
Жекшенкулов жана элчиликтин штабы азыркы кырдаалда жасалып жаткан иштери тууралуу маалымат берген. Алар Кыргызстандагы кырдаалды эске алып, жүйөлүү себеп болбосо мекенге баруудан карманып турууга чакырышкан. Ошону менен бирге кыргызстандыктарга жумуш табууга көмөктөшүп жатканын айтышкан.
"Кыргызстандын жарандарына 6 000 жумуш орун сунушталган. Анын ичинен 3 500үнө иштей тургандар табылып, ал эми 3 000ден ашыгы бүгүнкү күндө актуалдуу бойдон калууда. Элчиликтин жана Мамлекеттик миграция кызматынын өкүлчүлүгүнүн сайттарында, социалдык баракчаларында бул тууралуу маалымат жайгаштырылган", — деп айтылат маалыматта.
Ал эми ИИМдин Россиядагы өкүлү чартердик каттамга билет алып берүүдө акча талап кылуу боюнча беш материал каралып, эки фактыга кылмыш ишин козгоо иш-чаралары жүрүп жатканын билдирген.
"Үстүбүздөгү жылдын алты айында 101 адамдын сөөгүн жөнөтүүдө көмөк көрсөтүлгөн. 20-марттан 24-июлга чейин 78 авиакаттам, Казакстан аркылуу 52 автобус каттамы уюштурулуп 19 111 жаран Кыргызстанга жеткирилди. Дагы деле мекенге кайтуу үчүн кайрылгандардын саны азайган жок. Ушуга байланыштуу рейстерди дагы эки рейске көбөйтүү боюнча иш жүрүп жатат. Башкача айтканда, жума сайын Москвадан Бишкек жана Ош шаарларына беш авиакаттам уюштуруу пландаштырылууда", — деп айтылган элчиликтин маалыматында.
Министр Айдарбеков: Кыргызстан эли эпидемия маалында мыкты сапатын көрсөттү
Талкуунун жүрүшүндө активисттер мекенге кайтууну сурап кайрылгандарга электрондук кезекти иштеп чыгууну сунушташкан. Ал эми каза болгон адамдардын сөөгүн коштогон жарандарды тизмеге кезексиз кошуу жана Avia Traffic авиакомпаниясынын борттору менен "Жүк-200дү" жеткирүү боюнча кайрылышкан.
