Акушер-гинеколог: төрөт учурунда дарыгерди угуу зарыл
Учурда Бишкек шаардык перинаталдык борборунда кош бойлуулар үчүн жакшы шарт түзүлгөн. Ремонт жасалды, бөлмөлөр жетиштүү. Бир жылда 10 миңге жакын төрөт кабыл алынат. Бул тууралуу Миргүл Исмаилова Sputnik Кыргызстан радиосунун эфиринде маек куруп жатып билдирди.
Анын айтымында, аял төрөт үйүнө барарда медициналык картасын, паспортун, балага жана өзүнө керектүү кийим-кечелерин гана алышы керек. Дары-дармек алуунун кажети жок.
"Төрөттөгү ыйынуу учуру абдан татаал жана жоопкерчиликтүү. Туура эмес ыйынган маалда түйүлдүктүн киндиги кыска болсо бала эненин ичинде суу жутуп алып, жүрөгүнө доо кетиши ыктымал. Ошондуктан төрөт учурунда аял акушер жана дарыгерди угушу керек. Алар кайсы учурда дем алып, ыйынышын айтып турушат. Ал эми кесарево ыкмасы пландуу жана шашылыш түрдө жасалат. Эгер буга чейин да операция жолу менен көз жарса, жатындын тону туура эмес жайгашса, бала туурасынан жатып калса, жамбашы менен төрөлө турган болуп, көлөмү чоң болсо, андан тышкары, невропатолог, травматолог, окулисттер өзү төрөй албайт деп чечим чыгарса операция жасалат. Ошондой эле кан кетип, жүрөгүнүн согушу начарлап, баланын киндиги эрте түшүп калса да шашылыш түрдө кесарево жасайбыз", — деди Исмаилова.
Дарыгер кош бойлуулукка атайын даярдануунун деле кереги жоктугун, дени сак жашоо образын кармануу эле жетиштүү экенин кошумчалады.
