БИШКЕК, 20-ноя. — Spuitnik. Кыргызстанда "Коопсуз шаар" долбоору башталгандан тарта 19-ноябрга чейин жол эрежелерин бузган 809 миң 550 токтом жазылып, автоунаа ээлерине жөнөтүлгөн. Бул тууралуу Жол кыймылынын коопсуздугун камсыздоо башкы башкармалыгынан кабарлады.
Жогорудагы токтомдордун ичинен 379 миң 464 эреже бузуудан айып пул төлөнгөн. Тагыраагы, түшкөн акчанын көлөмү — 456 миллион 529 миң сом болгон.
Муну менен кошо эле Бишкек шаары менен Чүй облусунун камера орнотулган жерлеринде жол кырсыгы менен жол эрежелерин бузган учурлардын азайганы байкалган.
"Борбор калаада төмөндөө 45,1 пайызды (113төн 62ге чейин) түзүп, каза тапкандар болгон эмес, жаракат алгандар азайган. Ал эми Чүй дубанында 50,0 пайыз азайып, бирөө көз жумса, жаракат алгандардын көрсөткүчү төмөндөгөн", — деп айтылат маалыматта.
Эске салсак, "Коопсуз шаар" долбоору 12-февралдан тарта ишке кирген. Бирок жол эрежесин бузган айдоочуларга айып салуу 4-марттан тарта башталган.
